ANTÍA tráenos uns PITOS!!!

ANTÍA trouxo esta semana un novo instrumento para presentárnolo na aula. 
Trátase duns "PITOS", que son unhas CASTAÑOLAS pequeniñas que se colocan case na punta dos DEDOS e que producen un son moi agradable ó tocalas. 
Consisten nunha parella de anacos de madeira cun oco interior, para dar maior resonancia e redondeadas no exterior.  Teñen 2 furadiños por onde pasa un cordel ou gomiña, como neste caso, que manterá xunta a parella e permite sostelas e tocalas. Colócanse normalmente sobre o dedo ANULAR ou o CORAZÓN. 
Moitas grazas á familia e á profe de pandereta que llos prestou!
Aquí vos deixo un vídeo demostración.

Palabras do mes de...

A mediados do mes de Novembro comezamos cunha rutina nova para o encargado: “A palabra do mes de________”

Cada día, o encargado ou encargada escribe o seu nome, escribe o día do mes no que estamos e escribe a palabra que queira.

Agora que xa temos as palabras de varios meses vese cómo foron mellorando e as palabras que se lles foron pasando pola cabeza. 

Foron empregando as letras minúsculas que ían aprendendo, por iso nalgunhas palabras mesturamos ás veces maiúsculas e minúsculas. 

Algúns escribiron as palabras sós, outros escoitándoas dicir despaciño e oíndo os sons, outros escribían según as dictábamos entre todos, e algún copiounas.

Algunhas palabras estaban relacionadas con cousas da clase ou do que estabamos traballando, outras con cousas que nos gustan ou con cómo nos sentíamos, palabras que críamos que saberíamos escribir sós...

Moitas deron para falar delas despois, como cando escribiron fútbol e baloncesto e saíu o tema dos deportes e o xénero. Grazas a isto abriuse un debate sobre gustos, sobre qué se nos da ben ou mal. Os desacordos e a curiosidade de algúns levounos a ver uns vídeos dunhas futbolistas dominando o balón e duns rapaces campións de ximnasia rítmica. Foi moi interesante este debate, os cambios de opinión e cómo valorabamos despois esta cuestión.

Outro día saíu a palabra Dakar e aproveitamos para buscalo no noso Atlas e ver ónde estaba. 

Houbo palabras moi difíciles de escribir que nos custaron un montón e outras que saían soas.

O máis importante e que todos os días estamos desexando escribir a palabra do mes!

Día do amor e a amizade!

Este venres celebramos preparámonos para o Día do Amor e a Amizade cuns corazóns que quedaron moi chulos!

Como todos son grandes amigos, todos se regalaron entre sí os corazóns!

Saímos no xornal!

Hoxe volvemos saír no xornal!!!! Esta vez vense algúns disfraces máis e algúns nenos máis da clase;)

El Progreso

Entroido con Manuel María!

O venres celebramos o Entroido e comezamos coa actuacións dos nenos e nenas que participan na actividade de Boadway !

Logo, celebramos todos xuntos un Entroido moi especial en homeaxe a Manuel María no que participou todo o cole! 

Os poemas de Manuel María préstanse moito para traballar en infantil e primaria e deron uns disfraces xeniais e moi orixinais: soles, lúas, estrelas, muíños, pastores, mariñeiros... a uns encantáronlles os mariñeiros cos seus barcos, a outros os pastore, outros encantoulles ser estrelas... o máis imortante é que o pasamos moi ben, rimos moito e agardamos que o disfrutarades vós tamén!

E hoxe saímos no xornal(El Progreso)! Unha pena que a imaxe non teña moito que ver co pé de foto... ;)

Ano novo chino: "Año del Mono Rojo de Fuego"

O ano pasado celebramos nestas datas o ano da Cabra e esteano o do Mono!

Estimulación da linguaxe!

Como sabedes, este ano continuamos tendo as nosas sesións de estimulación da linguaxe con contos xeniais e  ximnasia para as nosas linguas! 

Nova caixa para os coxíns!

Levounos varios días preparala, pero por fin os nosos coxíns teñen caixa nova!

Preparados para o inverno!

Xa temos a clase decorada de inverno! 

Día da Paz!

Hoxe conmemoramos no cole o Día da Paz! Durante esta semana decoramos a clase e entre todos os nenos e nenas de infantil fixemos un arco da vella coas pegadas das nosas mans e cunhas nubes azuis xeniais. 

Hoxe aproveitamos para facer unha festa xunto cos nenos e nenas da outra clase de 5 anos: comemos, bailamos... pasámolo pipa!

Para rematar, todos xuntos aprendemos unha canción especial para este día que cantamos todos xuntos. 

Disfraz de entroido!

Onte enviamos unha nota na que se explicaba cómo se fai a vosa parte do disfraz deste ano.

Só hai que:

      1. Cortar 4 tiras para facer os  tirantes e de suxeccións laterais.

(Non o deixedes moi xusto para que lles colla ben a roupa debaixo para o desfile)

      2. Debuxar unha estrela en cada prancha de goma eva o máis grande posible e recortalas.

     3. Grampar as tiras ás estrelas.

     4. Facer unha cara ou debuxada ou co material que queirades.

Podedes traelos tan pronto os teñades.

Para calquer cousa non dubidedes en preguntar!

Izan xa o trouxo hoxe e quedou xenial! Así que nos pode servir de modelo ;) 

ANTÍA trae unha sorpresiña!

Hoxe ANTÍA trouxonos unha sorpresiña: un PEITOQUE!

Trátase dun INSTRUMENTO de PERCUSIÓN parecido a unha castañola. 

Chámase peitoque porque se coloca no peito e se toca a "toques". 

Fórmase por dúas pezas de MADEIRA con forma de CÍRCULO. 

Dentro hai un oco, unha CAIXA DE RESONANCIA. 

Leva ademais unha goma que as une e unha corda.

Tivemos a sorte de que llo prestaran para mostrárnolo na clase. Fixo unha pequena demostración para que viramos cómo se emprega e escoitaramos o seu son.

É un instrumento moi orixinal e curioso. Encantounos e enriba deixóunolo probar a todos!

Moitas grazas á familia e á profe de pandereta que llo prestou por darnos esta oportunidade!

"TELE OLIVIA!"

Menuda sorte temos, hoxe Oli e a súa  nai compartiron un invento revolucionario: unha tele feita por elas e que conta uns contos xeniais! 

Léronnos 2 contos que nos gustaron moito. OLI leunos estupendamente "OS TRES PORQUIÑOS" e pudémolos ver na "tele" coa axuda da súa nai.

Logo a súa mamá, SONIA, leunos "ANTÓN, O GATO LAMBÓN" e OLI fixo posible que o víramos na "pantalla".

Estivo xenial e máis de un quedou coa boca aberta!

Para facer esta supertele e os contos traballaron xuntas OLI, SONIA e DANIELA. Un traballo en familia que valeu moito a pena! ;)

 Moitas grazas ás 3 por colaborar e animarvos a participar na clase!

Abrindo os regaliños para a nosa aula!

Hoxe chegamos e alí estaban!!!! 

Algúns xa sospeitaban que teríamos algo agardando na clase e estaban no certo. Ademais atopamos unha carta asinada polos Reis Magos, Papá Noel e o Apalpador!

Por suposto que se nota que teñen espías por todas partes, porque nos deixaron cousas que dixemos na clase que nos virían estupendamente! 

Algúns dos nenos dixeron que eles tamén lles comentaran algo ós Reis para que trouxeran estas cousiñas.

Festival de Nadal 2015!

Agardamos que disfrutarades do Festival tanto como o fixemos nós ;) Aquí vos deixo un resumo. Se queredes velo máis grande pinchade na parte superior dereita.

Bo Nadal a todos e todas!

Calendarios

Aquí vos deixo os debuxos de Nadal dos calendarios para o ano 2016 que elaboraron os nenos e nenas da clase.

Melchor na nosa porta!

Pois así decoraron os cativos a nosa porta! Pintaron, pegaron, recortaron estrelas... quedou estupenda!

Manualidade de Papá Noel!

A semana pasada rematamos unha manualidade dun Papá Noel que entra e sae da chimenea, encántanos!

Nadal co Apalpador!

Encántanos o Nadal e a nosa clase xa está decorada para celebralo! Ó  longo do mes de Decembro fomos facendo algunhas manualidades de Nadal para decorar a nosa clas,e ó tempo que aprendemos algunhas panxoliñas.

Ademais coñecemos ó Apalpador e hai que ver cómo nos gusta a historia do Apalpador e a súa canción! Por suposto, algúns xa o coñecían ;)

O mural está xa colgado na aula e queda xenial. Tamén aproveitamos e fixemos uns mini-Apalpadores que quedaron moi chulos!

Mural novo!

Por fin rematamos o mural da árbore do bosque!

Levábamos traballando nela xa máis de 2 semanas e esta semana puxémoslle os últimos pequenos detalles que nos faltaban.
Fixemos as follas da árbore estampando esponxas con distintos tons de verde que mesturamos na aula e puxemos unhas cantas follas de Outono das que recolleron no patio os compis.
O tronco fixémolo arrugando e retorcendo papel pinocho marrón.
A herba pintámola con rodillo e logo salpicámola con un verde moi clariño empregando un cepillo de dentes.
A matogueira pintámola con rodillo e cun verde diferente que fixemos e puxémoslle froitos vermellos cos dedos.
O fondo de celofan azul decorámolo con estrelas estampadas cos nosos dedos en cor dourado. No alto puxemos unha Lúa chea.
Para rematar pegamos a porta e pintamos as ventás da casiña dos esquíos Chip e Chop.

Saída "O bosque moito máis que madeira" e "Animalandia"

Hoxe realizamos unha saída á cidade de Lugo. Comezamos cun paseo a pé ata a Praza Maior. unha vez alí subimos ó templete da música, onde comemos un pouquiño para ter forzas para as visitas que nos agardaban. 

Primeiro visitamos a exposición "O bosque moito máis que madeira". Estivo xenial, moi recomendable sen dúbida! A nosa guía falounos de forma moi didáctica dos nosos bosques e de toda a vida que neles podemos atopar. O mellor foi poder tocar e experimentar por nós mesmos, pero tamén nos encantaron as imaxes, as pezas e reproducións. Na nosa clase por unanimidade o mellor foi tocar a reprodución realista dunha fermosa cabra e as sementes que estaban enganchadas na súa pelaxe.

Aprendemos sobre a terra, as plantas, as árbores, os animais... cómo a vexetación beneficia ó noso mundo e cómo a natureza se abre paso para continuar.

Unha vez rematada a visita achegámonos ó Museo Provincial de Lugo para a realizar a actividade "Animalandia". Puxeron as gorras de investigadores felinos e caninos para rastrear os cadros e esculturas en busca de animais. Para amenizar a actividade, puxéronnos unhas pegatinas de cariñas moi simpáticas por atopar os animais e déronnos a tocar as texturas do pelaxe e plumas de distintos animais. foi moi entretido!

Vídeo recitando a Manuel María polo Samaín!

Como sabedes, cada ano adícase o día das Letras Galegas a unha persoa destacada pola súa creación literaria en lingua galega. No ano 2016 o homenaxeado será o poeta Manuel María, nado en Outeiro de Rei. Por esta razón, durante este curso académico realizamos un achegamento a este poeta. 

Así, comezamos xa dende a primeira conmemoración, o Samaín. Esta festa con raíces celtas propias da nosa terra galega, chega este ano impregnando ás aulas cos versos de Manuel María.

Mural feito polos nenos e nenas de infantil.

Se pinchades aquí, accededes a páxina web da nosa escola e podedes ver o vídeo onde  os nenos e nenas recitan para o desfrute de toda a comunidade educativa tres dos seus poemas relacionados con elementos tan característicos desta festividade, como son: “A Lúa”, “O Lobo” e “O corvo”.

Para ver en grande os vídeos podedes pinchar no vínculo que aparece na parte superior dereita dos vídeos (onde pon ventá externa).

Agardamos que vos gusten e desfrutade da noite de Samaín!

Cousiñas Samaín!

Aquí vos deixo algunhas das cousiñas de Samín que fixemos.

Cousiñas que chegaron a clase...

A próxima semana  mostraremos uns mandalas de outono e Samaín moi chulos pintados con acuarelas e que decoran a porta da aula. Tamén pintamos un gato digno dunha meiga, pero como queremos que todos participen agardaremos a estar todos para poñelo na porta. Os nenos que aínda están maliños, agardamos que sanedes prontiño, disfrutedes da ponte e volvades con forzas, que xa vos botamos de menos!

Cancións de Samaín!

Aquí vos deixo algunhas das cancións que máis nos gustan na aula relacionadas coa festa do Samaín. Ollo que moitos xa as saben ou case!

Conmemoramos o Samaín!!!

Como xa sabedes estamos no tempo do Samaín, unha festa de orixe celta, que conmemoraba o fin do verán, o fin da época da colleita e o principio do inverno.

Para os nosos antepasados celtas, a última noite do mes de Outubro era un momento de cambio: do veran ó inverno; de andar ó sol fóra da casa, a recollerse o carón do lume dunha lareira para matar o frío; e a morte do Sol para entrar no tempo da oscuridade.

Era unha noite para comer e beber os  froitos da colleita e almacenar para o duro inverno. Esta noite era unha noite de festexos, e os "druídas" das aldeas tiñan un papel especial. Nesta noite de cambio críase que a porta do máis alá estaba aberta para que os defuntos se puideran comunicar cos vivos. 

As almas viñan á terra con moi diversos fins, para uns con bos propósitos e para outros con non tan bos fins. De aquí as tradicións relacionadas coa comida, coas "figuras de medo" e o lume. Así, por exemplo, tallaban caras nas cabazas e acendían lumes, para afastar os malos espíritos. 

Na nosa clase comezamos a semana pasada a facer un achegamento a esta conmemoración con actividades de todo tipo. 

Aquí podedes ver o resultado das bruxiñas que decoraron na casa. Moitas grazas a todos por colaborar! Encantáronnos e xa decoran a entrada de infantil. 

Carla, encantounos tamén a bruxiña que nos mandache e estamos desexando que te poñas boa para poñer a túa foto coa bruxiña.

Olivia, tamén agardamos que te mellores para festexar contigo o Magosto e o Samaín.

Algunhas das merendas tamén chegaron "tuneadas" de Samaín!

DÍA DAS BIBLIOTECAS!

Mañá, 24 de Outubro,   celébrase o Día Internacional das Bibliotecas e con este motivo hoxe conmemorámolo no cole. 

Posto que este curso se lle adica o Día das Letras ó poeta Manuel María, que naceu en Outeiro de Rei, este tivo unha presenza especial nas aulas da nosa escola.

Os nenos e nenas de 5º e 6º de EP visitaron as aulas do cole para recitarnos varios poemas relacionados co Outono que nos encantaron! Eran fermosos e foron moi ben recitados. 

Nos próximos días visitaremos a biblioteca do cole, posto que nestes días somos moitos os que queremos ir. Por sorte os nenos de 5º trouxeron un cachiño da biblioteca do cole cos seus poemas. Moitas grazas a todos!

Doutra banda todos os nenos do cole decoremos uns "pins" moi chulos para recordar esta conmemoración. Quedaron moi chulos!

Dinosaurios!

Comezamos cun pequeno proxecto sobre os DINOSAURIOS e como sempre podedes colaborar con contos, puzzles, xoguetes, pelis... calquer material que se vos ocorra! Por suposto estades invitados se queredes realizar algunha actividade con nós ou vir ler un conto ;)

Xa en 6º de infantil!!!

Benvidos o blogue de 6º B de infantil un ano máis!!!

Comezou o novo curso e xa estamos a todo tren! Agardo que tiverades un verán estupendo e que repoñerades forzas para este último curso de educación infantil!

Este curso comezamos con moitas ganas de aprender cousas novas ó tempo que nos divertimos.